Rangavalli-A poem by Mrs.Anitha Naresh Manchi

ರಂಗವಲ್ಲಿ

ಗುಡಿಸಿ ಸಾರಿಸಿದ ಅಂಗಳದಿ
ಮೆಲ್ಲನಿಟ್ಟಲು ಚುಕ್ಕಿ
ನಕ್ಷತ್ರದಂತೆ ಹೊಳೆಯಿತದು
ಕಣ್ಣಲ್ಲಿ ಪಳಪಳಿಸಿ
ಯಾರನ್ನೋ ಧೇನಿಸಿದಂತೆ .....
ಉಹುಂ ..ಇಲ್ಲಲ್ಲ..ಇಲ್ಲಿ ..
ಎಂದು ಮನದಲ್ಲೇ ಕೂಡಿ ಕಳೆದು
ಇತ್ತಳು ಒಂದೊಂದು ಚುಕ್ಕಿಗೂ
ಸಮಾನ ಅಂತರ ....
ಸುಮ್ಮನೆ ನಿಂತೊಮ್ಮೆ ನೋಡಿ
ಹಿಮಧಾರೆಯ ಸುರಿಸಿದಳು
ಕಡಿದು ಬಿದ್ದ ಸಂಬಂಧಗಳ
ಮತ್ತೊಮ್ಮೆ ಜೋಡಿಸಿದಂತೆ......
ಮೂಡಿದ ಸುಂದರ ಚಿತ್ತಾರವ ನೋಡಿ
ಮೆತ್ತಗೆ ತನ್ನ ಹೊಟ್ಟೆ ಸವರಿ
ನಸುನಕ್ಕು ತಿರುಗಿದಳು
ಅದ ತುಳಿವ ಪುಟ್ಟ ಬಂಗಾರದ
ಪಾದಗಳು ಕಂಡಂತಾಗಿ
ಒಳ ಸರಿದಳವಳು ಒಂದು ಕನಸಿನಂತೆ......