ಒಲವಿನ ಹನಿಗಳು

ದೂರವಿದ್ದಾಗ 

ನೆನಪುಗಳಲಿ ಬಂಧಿ

ಹತ್ತಿರವಿದ್ದಾಗ 

ಕನಸುಗಳಿಗೆ ಸ್ವಾತಂತ್ರ್ಯ

  ***

 ನೆನಪುಗಳೋ

ಕಣ್ಣೆವೆಯೊಳಗಿನ ಕನಸುಗಳಂತೆ

ಬಿಚ್ಚಿದರೆ ಸ್ವಾತಂತ್ರ್ಯ

ಮುಚ್ಚಿದರೆ ಜೀವಂತ

***

ಮತ್ತಷ್ಟು ಬದುಕುವಾಸೆ ನನಗೆ

ಕಣ್ಣ ಕನಸುಗಳಿಗೆ ಬಣ್ಣ ತುಂಬಲಿದೆ

ನಿನ್ನ ನೆನಪ ರಂಗಿಂದ

ಇಂದೇ ಸಾಯುವಾಸೆಯೂ ನನ್ನದೇ

ತುಂಬಿಬಿಡಲಿ ನಿನ್ನ ಕಣ್ಣುಗಳು

ನನ್ನ ನೆನಪಿನಿಂದ ..

***

ಕೆಡಿಸದಿರಿ ನಿದ್ದೆ

ಕನಸುಗಳ ರಂಗು

ಚೌಕಟ್ಟಿನ ಹೊರಗೂ

ಚೆಲ್ಲೀತು..

***

ದಾರಿ ದೂರವಿದೆ

ಚಿಂತೆಯಿಲ್ಲ..

ನಿನ್ನ ನೆನಪ ಬುತ್ತಿಯಿದೆ..

***

ದಾರಿ ಕವಲೊಡೆಯುವುದಾದರೆ

ಹಿಂತಿರುಗೋಣ

ಬಂದ ದಾರಿಯಲ್ಲೇ.

***

ಒದ್ದೆಯಾಗಲಿ ಮನಸು

ನಿನ್ನ ನೆನಪ ಸ್ವಾತಿ ಮಳೆಯಲಿ

ಚಿಪ್ಪಿಗೂ ನಾಚಿಕೆಯಾದೀತು ಬಿಡು

ಮುತ್ತುಗಳಿಗೇಕೆ ಲೆಕ್ಕ..

***

ಬಳಿಯಿರುವಾಗ 

ಕಣ್ಣೆತ್ತಲೂ ನಾಚಿಕೆ

ದೂರವಾದಾಗೇಕೋ

ಬೇಕೆನಿಸುವುದು ಅಪ್ಪುಗೆ

***

ಮನದ ಕಿಟಕಿ ತೆರೆದರೆ

ಒಳ ಬಂದ ಬೆಳಕೆಲ್ಲಾ

ಅವನದೇ ನೆನಪು..

***

ಉಸಿರಿಗೂ ಜೀವಕ್ಕೂ 

ಸಂಬಂಧವೇ ಇಲ್ಲ 

ನಿನ್ನ ನೆನಪುಗಳಿವೆ ಬದುಕಲು..

***

ನೀರಿನೊಳಗಿನ ನೀನು

ಹೊರತೆಗೆದರೆ

ನಿನ್ನ ನೆನಪುಗಳಿಲ್ಲದ ನಾನು..

***

ಮನಸು ಕತ್ತಲ ಗೂಡು

ಒಳ ಬಂದ ಬೆಳಕಿಲ್ಲಿ

ಸ್ವತಂತ್ರ

***

ಖಾಲಿ ಇರಲಿ ಮನಸ ಖೋಲಿ

ತುಂಬಬೇಕಿದೆ ನೆನಪುಗಳ ಪೆಟ್ಟಿಗೆ

ಮುಚ್ಚಳ ಸರಿಸಿದರೆ 

ಕನಸು ಕಾಣುವ ನೀನು..

***